路易斯迪亞斯開齋　拜仁重奪德超盃

周日(17日)凌晨德超盃，上季德甲冠軍拜仁慕尼黑以2比1擊敗德國盃盟主史特加，相隔3年再次奪得呢項錦標，為新球季打響頭炮。拜仁新簽翼鋒路易斯迪亞斯取得加盟後首個入波，展現身價，會方即將簽入車路士中場尼干古，勢必如虎添翼。

拜仁慕尼黑對上1次捧德超盃已經係2022年，今仗爭標鬥心十足，開賽18分鐘就由哈利卡尼射入打開紀錄。換邊之後，路易斯迪亞斯頂入成2比0，呢位28歲哥倫比亞國腳上月底以7,500萬歐元(約6.9億港元)轉會費由利物浦加盟拜仁，之前踢2場熱身身賽都食白果，今場終於開齋兼捧盃。

史特加喺補時由利維寧入波破蛋，但無阻拜仁破紀錄第11次奪得德超盃，比第2位多蒙特多5次。哈利卡尼繼上季捧德甲冠軍，打破職業生涯錦標荒後，迅速再奪第2冠，

值得一提，拜仁慕尼黑今夏積極斟介史特加前鋒禾達美迪，賽後史特加方面證實呢位23歲德國國腳留隊，但拜仁增兵行動仍未結束，德國傳媒指會方接近同車路士達成協議，即將收購車仔進攻中場尼干古，估計轉會費為4,500萬歐元(約4.1億港元)，雙方將簽約至2029年。呢位27歲法國國腳上季為車路士上陣48次入15球及5次助攻，加上曾效力RB萊比錫，早已適應德甲風格。