熱刺斟掂伊斯　變相「益咗」車路士？

根據「轉會權威」記者羅曼諾(Fabrizio Romano)爆料，熱刺已經同水晶宮進攻中場伊比爾治伊斯達成個人待遇協議，所以呢位27歲英格蘭國腳可能會缺陣周日(17日)晚英超水晶宮作客車路士，熱刺收購行動變相削弱水晶宮實力，「益咗」宿敵車仔。

熱刺已經斟介伊比爾治伊斯一段時間，近日加速談判工作，並取得突破，說服呢位球星接受合約條款，伊斯亦已向水晶宮管理層提出離隊要求，兩間球會將就轉會費問題展開談判，可能以6,000萬鎊(約6.4億港元)完成交易。

伊比爾治伊斯效力水晶宮5年上陣167場入39球，包括上季43次披甲有14球進帳及11次助攻，引起多間球會關注，當中以熱刺最積極，皆因急需簽人代替離隊嘅孫興民，收購目標除咗伊比爾治伊斯之外，仲有曼城翼鋒沙雲奴。