【有片】孫興民「神助攻」 FC洛杉磯終於識贏
去片睇孫興民貢獻助攻
周日(17日)早上美職，孫興民首次擔任正選，立即貢獻助攻，率領FC洛杉磯作客以2比0擊敗新英倫革命，打破連續3場聯賽不勝悶局，加上呢位南韓國腳球衣熱賣，帶挈FC洛杉磯名利雙收。
孫興民早前由熱刺加盟FC洛杉磯，上場美職首次披甲，後備上陣博到12碼，協助球隊逼和芝加哥火燄2比2。呢位33歲前鋒今仗擔任正選，並踢足全場，FC洛杉磯佔上風，51分鐘由馬高迪加度勁射入網打開紀錄。
戰至補時，球迷最期待畫面出現，孫興民盤球殺入禁區，但並冇貪功射門，選擇斜傳畀位置更佳嘅馬菲奧祖尼亞射成2比0，FC洛杉磯經過前3場聯賽2和1負頹勢後，終於重敲勝鼓。
孫興民加盟FC洛杉磯，除咗增強球隊實力之外，亦提升財政收入，根據FC洛杉磯聯席會長之一嘅杜寧頓透露，「孫仔」7號球衣成為近兩星期全球各項運動最暢銷波衫，包括多過另1位美職球星美斯，以及兩位NBA巨星勒邦占士、史堤芬居里嘅球衣銷量，可見孫興民「吸金」能力極強。