艾達臣「被生病」等離隊　曼城接近簽當拿隆馬

曼城今季首場英超以4比0大勝狼隊，1號門將艾達臣摩拉斯並冇入選球員名單，雖然主帥哥迪奧拿指呢位巴西國腳因為身體抱恙缺陣，但盛傳佢其實緊等轉投加拉塔沙雷，無謂冒上陣受傷風險影響轉會，「藍月亮」亦已斟掂基安盧基當拿隆馬，準備接替艾達臣。

哥迪奧拿透露艾達臣摩拉斯出現腸胃問題，不斷嘔吐，所以未能出戰狼隊，由早前回巢嘅占士查科特把關。與此同時，艾達臣摩拉斯離隊問題有新發展，根據「轉會權威」記者羅曼諾(Fabrizio Romano)爆料，土耳其勁旅加拉塔沙雷正式向曼城提出，以1,000萬歐元(約9,200萬港元)收購艾達臣，但「藍月亮」方面認為價錢太低，要求對方加碼，兩間球會將繼續磋商。32歲嘅艾達臣摩拉斯將於明夏約滿，並冇打算續約，預料曼城將盡快出售佢，以免人財兩失。

曼城等出售艾達臣摩拉斯後，就會立即簽入基安盧基當拿隆馬，呢位26歲意大利國腳日前發表聲明，承認今夏離開巴黎聖日耳門，隨住曼聯、車路士退出搶人，「藍月亮」成為最大機會簽入呢位鋼門嘅球隊。