曼聯同迪基亞重修舊好　合約條款有助回巢

曼聯今個暑假執靚條鋒線後，依家重點擺喺中後場，其中門將位置最為急切。據英國《太陽報》報道，曼聯有意收購昔日門神迪基亞，佢喺費倫天拿嘅合約條款，有助佢重返奧脫福！

曼聯夏天打算簽基安盧基當拿隆馬、達米安馬天尼斯等頂級門將，但因轉會費高昂都冇晒下文。據《太陽報》消息，曼聯希望奧拿拿或比恩迪亞其中一人離隊，騰出薪酬空間去買新龍門，但兩人一直賣唔出，令計劃受阻。

報道指曼聯正考慮簽番迪基亞，呢位西班牙門將同費倫天拿合約內，有相對較低嘅轉會費條款，曼聯可以輕鬆負擔。早前費倫天拿同曼聯踢熱身賽，迪基亞亦曾暗示：「重返奧脫福呢個家，對我同家人意意重大，我由心底感激球迷一直嘅支持，或者有一日我哋會再走相同嘅道路。」