莫耶斯解放基亞利殊　要佢做「新連格」

愛華頓今夏積極組軍，多位新兵入面，最受注目肯定係由曼城借用嘅基亞利殊，領隊莫耶斯對呢位英格蘭球星寄以厚望，更表明希望佢可以成為「新連格」！

29歲嘅基亞利殊上季喺曼城淪為大後備，今季獲愛華頓借用力圖翻生，雖然加盟只有1個星期，但莫耶斯就暗示首戰對列斯聯考慮派佢上陣：「佢同之前冇乜分別，小腿一樣係咁強壯！你哋入場就知佢今仗會唔會上陣。」

莫耶斯4年前執教韋斯咸嗰陣，曾向曼聯借用棄將連格，結果連格效力半季，踢16場就交出9入波同5助攻，莫耶斯表示：「基亞利殊嘅最好模範就係連格，當年我將連格帶去韋斯咸，冇人預期佢會成功，甚至有啲睇死佢，但佢最後幫自己重返英格蘭國家隊。」

基亞利殊近年多數踢翼鋒，不過莫耶斯就準備將佢解放，發揮佢嘅進攻潛能：「基亞利殊可以踢幾個位，翼鋒都中場都冇問題，我嘅目標係將佢放喺最具創造力嘅位置，令佢可以入波同助攻，我會幫佢完成呢項挑戰。」