水貨發現？約基利斯首演「0」射門

阿仙奴喺開咧戰作客1比0擊敗曼聯，不過新箭頭約基利斯首演就平平無奇，踢咗60分鐘未有做出任何射門，甚至未有製造入球機會，令球迷擔心佢係「葡超水貨」。阿仙奴領隊阿迪達賽後承認球隊表現未達水平，約基利斯仍要時間磨合。

阿仙奴夏天用6,400萬鎊收購約基利斯，今場首演就正選上陣，但球隊今場被曼聯逼搶難以組織，進攻乏善可陳。約基利斯喺缺乏供應下，經常要返後幫手，結果全場0次射門，係佢自2023年4月(效力高雲地利)之後首次出現，最後佢喺60分鐘就被夏維斯入替。

近2季為士砵亭入超過100球嘅約基利斯，喺阿仙奴第1戰變「隱形戰機」，唔少球迷已斷定佢係「水貨」，但阿迪達表示：「約基利斯今場都有好多貢獻，尤其係逼搶同配合球隊節奏。我哋今場表現係未達水準，進攻距離太遠，約基利斯搵唔到機會，呢方面需要改善。但球季第1場就喺奧脫福贏波，絕對係個好開始。」