奧迪加特半場「被逼」受訪　直播新措施惹反感

英超首輪重頭戲「仙魔大戰」備受注目，電視台亦搞搞新意思，啟動今季英超首度引入嘅轉播新措施。阿仙奴隊長馬田奧迪加特喺半場返更衣室期間，被逼要停低接受訪問，不過呢項新措施就引嚟球迷反感，彈多過讚。

英超同電視台簽新轉播合約後，為提升「轉播體驗」，規定所有球會每季都要配合電視台，進行兩次「特殊拍攝」，包括半場採訪、比賽中被換出球員即場採訪、進入更衣室拍攝等等，不過都有保障球會嘅輔例，例如球會有權喺落後嗰陣拒絕拍攝、訪問問題需要「正面」、「比賽相關」同「唔會引起爭議」等等。如果球會拒絕過一次，就有義務喺之後「補」番另一次拍攝。

奧迪加特今場喺半場接受電視台訪問，時間大約係1分鐘，當時阿仙奴領先1比0，奧迪加特表示：「曼聯嘅前鋒好有質素，我覺得我哋畀佢哋太輕易穿透，不過我哋前面都有好多空間打反擊，但喺最後處理要更加精準。」

球迷睇到直播訪問後反應唔係咁好，網民表示：「簽呢啲合約嘅人肯定未踢過波」、「球員應該專注比賽，點解要中場做訪問」、「奧迪加特係隊長，佢應該喺更衣室入面同隊友一齊」、「從來冇球迷要求睇半場訪問」......