加拿祖變過街老鼠　奧脫福外壁畫被毀

阿根廷球星阿歷真度加拿祖，上季同領隊魯賓艾摩廉反面後，夏天已被禁制參加所有一隊活動。加拿祖為轉投車路士，不惜用罷踢威脅曼聯，令球迷非常憤怒，奧脫福球場外嘅加拿祖壁畫，就被發現打上「大交叉」。

奧脫福球場外有唔少球星壁畫，作為曼聯青訓嘅加拿祖曾經係球迷寵兒，但依家就成為過街老鼠，轉會權威羅曼諾早前透露，加拿祖向曼聯表明，如果唔賣佢去車路士，佢寧願喺嚟緊半年到1年「齋坐」，同曼聯一拍兩散。

英國傳媒報道，曼聯同車路士仍就轉會磋商，但車路士想先賣走尼干古或尼高拉斯積遜，騰出空間簽新球員，令轉會拖延。曼聯領隊艾摩廉之前亦表示，佢同加拿祖「合作唔到」，只能夠選擇分開。