費林邦創英超首周速度紀錄　受傷離場

衞冕英超嘅利物浦首輪4比2險勝般尼茅夫，唔少評論直指謝利美費林邦被調離場相當關鍵，總結英超首周數據，原來呢位荷蘭右閘創下英超首周最高速度紀錄，至於將佢換走，主帥施洛解釋係因為佢輕微受傷。

謝利美費林邦係利物浦今夏由利華古遜過檔嘅重磅收購之一，轉會費接近3,000萬鎊，據報佢首輪對般尼茅夫，錄得36.1公里時速，成為英超首輪最高速度紀錄。

現時英超最高速度紀錄，係由熱刺中堅雲迪雲去年1月創下嘅時速37.38公里，而男子100公尺世界紀錄保持者保特嘅最高時速，係37.58公里。

首輪表現突出嘅謝利美費林邦，比賽至60分鐘被換出，由遠藤航入替，評論指利物浦後防亦因此出現漏洞，被對方連追兩球，紅軍主帥施洛在官網解釋，因為當時謝利美費林邦腿筋不適，而同位置嘅祖高美斯狀態未足，所以用遠藤航客串，令球隊承擔風險。