搵定伊斯替身　水晶宮斟介黃喜燦

水晶宮進攻中場伊比爾治伊斯好可能轉投熱刺，會方亦積極物色接班人，英國《太陽報》指水晶宮頭號目標係狼隊前鋒黃喜燦，計劃借用呢位29歲南韓國腳1季。

熱刺準備以6,000萬鎊(約6.3億港元)收購伊比爾治伊斯，水晶宮上場英超對車路士前夕，一度傳出呢位27歲英格蘭國腳可能避戰等轉會，但最終仍然以正選上陣。

據悉伊比爾治伊斯仍然會出戰周五(22日)凌晨歐協聯附加賽首回合主場對費德列斯達，至於佢幾時離隊，好大程度上要睇水晶宮能否簽入新兵，會方已將黃喜燦視為伊斯嘅替身。

值得一提，前狼隊體育總監馬特賀比斯兩個月前離任後，將會加盟水晶宮，有佢穿針引線，大大增加借用黃喜燦嘅成功機會。不過，黃喜燦上季為狼隊上陣25場僅入2球及1次助攻，即使水晶宮借到佢，但能否發揮伊比爾治伊斯嘅作用，實在令人懷疑。