做隊長+續約　羅美路成熱刺「打工皇帝」

熱刺正式宣布同新任隊長基斯甸羅美路續約至2029年6月，據悉周薪高達20萬鎊(約210萬港元)，成為隊內最高人工球員。呢位27歲阿根廷國腳一度幾乎離隊，到現成榮升隊內「打工皇帝」，夠晒戲劇性。

基斯甸羅美路簽約後話：「好開心可以留隊，熱刺係世界最佳球會，近2星期先係成為隊長，跟住依家續約，對我而言係完美決定。」今年5月傳出基斯甸羅美路想轉投馬體會，但法蘭克成為熱刺新帥後，情況出現大逆轉，極力挽留呢位中堅，孫興民早前離隊後，更加委任基斯甸羅美路做新隊長，加上會方向佢開出全隊最高薪合約，成功打動羅美路續約。

基斯甸羅美路4年前由阿特蘭大加盟熱刺，累積上陣126場，並有8球進帳，協助呢支倫敦球隊奪得上屆歐霸盃冠軍，亦係阿根廷捧上屆世界盃冠軍成員。