C朗心情靚！完場扔「原味」波衫送球迷　

艾納斯周二（19日）於香港大球場出戰沙特超級盃，憑頭號球星基斯坦奴朗拿度貢獻一記助攻，最終以2比1險勝伊蒂哈德，順利闖入決賽。賽後C朗亦心情大好，即場脫下球衣拋到觀眾席；而艾納斯主帥佐治捷西斯則呼籲球迷在決賽，繼續入場支持偶像。

艾納斯今場早段雖有沙迪奧文尼被逐，但最終十人迎戰下仍能贏波晉級；當中交出一記助攻的葡萄牙球星基斯坦奴朗拿度，賽後相當開心，更在走入球員通道前，即場脫下「原味」球衣拋上看台，該名球迷隨即穿上身，並高舉雙手接受大家祝賀。不過C朗離開更衣室後，經過混合訪問區時並未有停低接受記者訪問，僅微笑揮手向大家問好。

至於艾納斯領隊佐治捷西斯在賽後記招亦不忘大讚C朗，又期望球迷可繼續在決賽入場支持這名傳奇射手：「即使C朗拿度已經40歲，但他狀態仍然相當出色，是不少球員的榜樣。相信是日大部份球迷，都是為C朗而來，希望球隊出戰決賽時，繼續得到大家支持。」