皇馬險勝奧沙辛拿 麥巴比瘋狂過人救全家
皇家馬德里周三(20日)凌晨喺西甲開咧戰，主場1比0險勝奧沙辛拿，為新帥沙比阿朗素回歸西甲打響頭炮。皇馬今場有4名新兵登場，不過圍攻對手之下，仍然要靠基利安麥巴比瘋狂過人製造機會，佢全場8次扭波過人，更博到12碼兼親自射入致勝球，一個救全家。
今場西甲首輪壓軸戲，皇馬主場狂攻「泊大巴」嘅奧沙辛拿，控球率高達7成兼有18次埋門，但係真正入肉嘅埋門唔多，一對中堅輪流遠射只係畀對方門將表演，靠晒麥巴比瘋狂扭波爆破製造機會。50分鐘麥巴比右路硬爆入禁區，博到祖安告魯斯飛鏟踢跌，麥巴比操刀12碼建功，助皇馬贏1比0。
皇馬今場雖然贏波，但進攻未見化學作用，雲尼斯奧斯祖利亞表現低迷，全場得1次射門同1次過人，結果係麥巴比單天保至尊，呢位法國國腳今場8次成功過人、2次創造機會同10次爭波成功，今場亦係佢喺皇馬第60場比賽，貢獻第50個入波(45入球+5助攻)。
皇馬連續17季西甲開咧不敗，打破由自己保持嘅16場西甲開咧連續不敗紀錄(1961-76)，教練沙比阿朗素賽後表示：「好開心重返西甲，球隊依家仲係調整階段，贏波可以令呢個過程更平和。我覺得麥巴比比之前更飢渴，唔知同佢改着10號有冇關，如果有幫助絕對係好事。」