皇馬4新兵登場　阿諾特羞家數據離乜譜

皇家馬德里今夏重整旗鼓，有新教練沙比阿朗素上任，西甲首戰對奧沙辛拿，防線更派出3大新兵阿歷山大阿諾特、甸恩胡積臣同艾華路卡拉利斯擔正，賽前加盟嘅馬斯坦杜奧奴亦後備上陣，不過雷聲最大嘅阿諾特，首甲首演表現迷失，更錄得「離乜譜」嘅羞家數據！

由利物浦過檔嘅阿諾特，一如所料以正選右閘上陣，但佢嘅踢法同皇馬格格不入，招牌長傳同傳中都冇料到，全場4次長傳都失敗、7次傳中得1次成功，防守方面就不嬲唔係佢強項，0次爭搶成功、0次重奪球權、2次畀對手扭過，最慘係有15次失去控球權，結果68分鐘就被換走。

沙比阿朗素賽後都好厚道，總結4個新兵表現：「我唔覺得佢哋因為皇馬波衫嘅壓力受到影響，4個新球員表現稱唔上好精彩，但都非常紮實，冇乜大犯錯，而且融入緊球隊。以第1場波嚟講，我睇到好多正面嘅訊號。」