伊沙克發聲明炮轟紐卡素：信任已經失去！

阿歷山大伊沙克嘅轉會鬧劇又有新發展，周三(20日)英格蘭職業足球運動員協會(PFA)頒獎禮，入選全年最佳陣容嘅伊沙克未有出席，但佢就發出聲明炮轟「僱主」紐卡素，直指對方背棄承諾，講明對球會已經失去信任，關係難以維持，強調轉會對大家都好，言辭相當激烈。

伊沙克上季為紐卡素入27球，成功入選PFA最佳陣容，但就並冇出席頒獎禮，佢發出聲明表示：「我冇出席今次典禮，喺依家發生咁多事嘅情況下，我覺得自己唔適合出席。」25歲嘅伊沙克依家一心轉會利物浦，用罷踢要脅紐卡素放人，夏天並冇隨隊去亞洲進行集訓，首輪英超亦冇入大軍名單。

伊沙克喺聲明表示：「當其他人說三道四，我一直保持沉默，但沉默令其他人喺佢哋嘅故事添油加醋，事實上佢哋乜都唔知。實情係紐卡素同我有協議，球會一早知道我嘅立場......當承諾被違背，信任亦都失去，呢段關係好難維持，呢個就係依家情況，轉變對大家都好，唔止我一個有利。」

據報伊沙克所指嘅「違背承諾」，係紐卡素曾應承上年夏天幫佢加薪，但喺高層變動後未有兌現。不過紐卡素隨後亦發聲明，否認有承諾過畀伊沙克今夏離隊，並重申無意將佢賣走。