洛迪高又坐冷板　一種情況曼城會簽佢

皇馬上場西甲僅靠基利安麥巴比射入12碼，以1比0小勝奧沙辛拿，翼鋒雲尼斯奧斯祖利亞表現低迷，但教練沙比阿朗素寧願用小將干沙路加西亞入替佢，都唔用擅長踢左翼嘅洛迪高高斯，呢位巴西國腳再次全場坐冷板，離隊機會愈來愈高，盛傳如果曼城出售沙雲奴，就會收購洛迪高高斯。

上季季尾已傳出洛迪高高斯不滿失去主力地位，要求轉會，沙比阿朗素接手領軍後，呢位24歲射手進一步被投閒置散，皇馬今夏出戰6場世冠盃，佢3場冇份上陣，另外3場合共僅踢93分鐘，當時已傳出會方準備出售洛迪高高斯，利物浦、熱刺、曼城都有興趣接貨。不過，皇馬將洛迪高高斯標價為8,000萬鎊(約8.4億港元)，佢要求29萬鎊(約304萬港元)周薪，令唔少買家打退堂鼓。

雖然賽後沙比阿朗素表示，洛迪高高斯仍屬於球隊計劃之內，但外界認為皇馬只係等緊其他球會出價。「轉會權威」記者羅曼諾(Fabrizio Romano)爆料，曼城準備將沙雲奴出售畀熱刺，一旦成事，就會收購洛迪高高斯，成為佢拯救事業最後機會。