艾摩廉想簽馬天尼斯　曼聯高層拒接納

曼聯夏天一直物色新龍門，經過開咧戰比恩迪亞嘅災難演出後，買龍門就更加急切，不過有阿根廷記者爆料，指領隊魯賓艾摩廉欽點收購達米安馬天尼斯，但曼聯高層就拒絕斥巨資收購，令情況陷入僵局。

阿根廷記者Gaston Edul爆料：「艾摩廉同佢嘅團隊好想簽馬天尼斯，馬天尼斯亦知道曼聯想簽佢，可惜艾摩廉說服唔到曼聯高層，買一個出色龍門對球隊有幾咁重要。曼聯高層認為奧拿拿已經喺度，但配合艾摩廉嘅要求會盡力試下，結果只係向維拉提出借用，維拉就講明只賣不借。」

馬天尼斯上年同維拉續約5年，不過佢上季煞科戰喊住告別球迷，打算夏天轉會，但至今仍然未有着落。曼聯早前傳出有意收購意大利門將基安盧基當拿隆馬，不過佢嘅轉會費同人工同樣價值不菲，曼聯未必負擔得起。