夏維斯重傷長抖　阿仙奴戲劇性「截劫」伊斯

志切挑戰英超冠軍嘅阿仙奴，周四(21日)突出重錘增兵，喺德國前鋒夏維斯重傷消息傳出後，緊急斥資6,700萬鎊收購伊比爾治伊斯，成功喺熱刺嘴邊搶走獵物。阿仙奴戲劇性「截胡」，夏天買人總花費達到2.7億鎊，爭冠決心極大。

開咧戰作客1比0擊敗曼聯後，阿仙奴周三(20日)傳出噩耗，前鋒夏維斯懷疑膝部嚴重受傷，詳細檢查仍有待進行，但預料將要抖一段長時間。雖然阿仙奴上月重金收購前鋒約基利斯，但喺加比爾捷西斯重傷未愈下，夏維斯缺陣仍是重大打擊。

阿仙奴隨即展開救亡行動，27歲嘅伊斯就成為最大目標，呢位水晶宮球星本來接近加盟熱刺，兩間球會已傾掂6,700萬鎊轉會費，球員合約亦接近完成，但阿仙奴突然開出同等條款，伊斯收到消息後即叫停熱刺斟介，並火速同阿仙奴達成協議。

據報伊斯將喺周五(22日)凌晨歐協聯外圍賽，最後1次為水晶宮披甲(對費德列斯達)，之後就會去阿仙奴體測兼簽約。倫敦出生嘅伊斯，出道曾效力阿仙奴青年軍到13歲，佢可以出任左中場、進攻中場同左翼，將成為阿仙奴夏天第7個收購，轉會總開支達2.7億鎊。