伊沙克返紐卡素基地 變過街老鼠慘被辱罵
瑞典前鋒阿歷山大伊沙克日前向紐卡素「發炮」後，周四(21日)突然重返紐卡素訓練基地，不過就慘變過街老鼠，揸車返去嗰陣沿途被球迷大聲辱罵，就連般奴古馬雷斯、祖連頓等隊友都喺社交網「開戰」反擊，成為「喜鵲」公敵。
伊沙克發聲明炮轟紐卡素「違背承諾」後，紐卡素已發聲明否認應承過畀佢轉會，雙方各執一詞。正式決裂後，伊沙克周四突然揸車返紐卡素訓練基地，但沿途有球迷不斷大聲辱罵「反骨仔」、「老鼠」、「貪錢怪」等等。
除咗球迷憤怒之外，紐卡素隊友亦紛紛表態，祖連頓就轉貼兼讚好球迷留言：「球迷冇欠你，唔值得受到你毀滅式嘅對待，紐卡素永遠唔會被打敗。」隊長般奴古馬雷斯就重貼自己着起紐卡素波衫嘅驕傲表情，暗諷伊沙克對紐卡素嘅不忠。