極端球迷圍攻山度士 聲稱要掌摑尼馬
巴西老牌球會山度士今季成績低落，周一(18日)主場吞華斯高6隻光蛋後，日前操練被大批球迷圍攻，有極端球迷組織更威脅會使用暴力，甚至話要掌摑代表球員出嚟講數嘅尼馬，好在最後有警察到場調停，未有出現嚴重事故。
據巴西《環球體育》報道，山度士球迷不滿球隊成績，日前周二(19日)闖入球會訓練基地抗議，尼馬同總監馬度斯就出面交涉，當時該極端球迷組織領袖向尼馬表示：「你係山度士領袖、係世界最佳球員之一，你輸波輸到喊，其他球員會點？你哋同55,000個主場球迷開玩笑？依家發生嘅事係不能接受，我哋要用暴力，我哋要摑醒你！」見慣世面嘅尼馬未有被嚇窒，只係盡量安撫球迷：「我哋會盡力嘗試去改變......」隨後警察到場驅散球迷，事件亦暫告一段落。
山度士輸畀華斯高後，尼馬一度流淚，而球員同教練安慰，球隊依家排喺巴甲第15位，只比降班區多2分，護級形勢相當險峻。