美斯又受傷　國際邁亞密照入北美聯盃4強

阿根廷球王美斯近期受到傷患困擾，上場聯賽啱啱復出，周四(21日)朝早北美聯賽盃8強再次因傷缺陣，好在佢「好兄弟」蘇亞雷斯擔大旗，個人梅開二度，助國際邁亞密絕殺堤格雷斯躋身4強。

今場比賽火藥味十足，國際邁亞密23分鐘博到對手查維亞阿基路禁區內手球，蘇亞雷斯射入12碼領先。兩隊之後愈踢愈辣，迪保羅同對手曾發生激烈爭執，要蘇亞雷斯走去勸交，而國際邁亞密教練馬斯真蘭奴，亦喺半場期間因投訴過激被逐。

堤格雷斯喺67分鐘靠安祖哥利亞個人表演追平，當比賽去到完場前3分鐘， 查維亞阿基路再次禁區內手球，蘇亞雷斯不負所托射入12碼，帶領國際邁亞密晉級。

國際邁亞密指美斯今場缺陣，係因為肌肉出現「輕微」問題，穩陣起見並冇上陣，但呢位38歲球星之前已因傷缺陣2星期，復出踢一場又要抖，健康情況令球迷擔心。