伊斯拒絕上陣　水晶宮歐戰第一擊僅小勝

水晶宮進攻中場伊比爾治伊斯即將轉投阿仙奴，拒絕為球隊出戰周五(22日)凌晨歐協聯附加賽首回合主場對費德列斯達，鋒線實力受削之下，僅以1比0小勝呢支挪威球隊，晉級形勢並唔穩陣。

水晶宮領隊格拉斯拿表示，原本安排伊比爾治伊斯今場擔任正選，作為告別戰，但呢位27歲英格蘭國腳婉拒：「老實講，我哋預咗伊斯踢正選，但當我打電話通知佢時，佢話呢個時候唔適合再上陣，我惟有接受，臨時更改陣容，的確令人感到困惑，尤其是今場係水晶宮首次踢歐洲賽，我哋會好好處理。」

水晶宮由祖斯甸迪雲尼頂替伊比爾治伊斯嘅位置，佢踢到69分鐘就被換走，由奧辛尼艾度亞迪入替，亦係水晶宮今場唯一一次換人，可見格拉斯拿仍未搵到合適人選代替伊比爾治伊斯。

水晶宮憑前鋒桑馬迪達54分鐘入波，小勝1比0，將於下周五(29日)凌晨作客踢次回合。