【官宣】坦哈格有收穫　利華古遜連簽兩位猛將

德甲勁旅利華古遜今夏有多位主力離隊，新帥坦哈格趁聯賽開鑼前，積極招攬新兵，現時有重要收穫，會方正式宣布成功借用曼城新星艾捷華利，以及收購西維爾中堅盧斯巴迪，並有望簽入艾卡迪沙中場艾基費南迪斯。

早前已傳出利華古遜向曼城提出借用艾捷華利，呢位19歲阿根廷小國腳通過體測後，以借用身份效力利華古遜1季。艾捷華利今年1月正式由河床加盟曼城，但僅上陣3場入1球，唯一入波係6月世冠盃分組賽，射入艾阿恩大門。艾捷華利可以勝任翼鋒同進攻中場，坦哈格想用佢代替轉投利物浦嘅域斯位置。

另外，利華古遜斥資2,900萬歐元(約2.6億港元)收購西維爾中堅盧斯巴迪，雙方簽約5年，代替轉投拜仁慕尼黑嘅莊拿芬泰希。根據「轉會權威」記者羅曼諾(Fabrizio Romano)爆料，利華古遜已經同艾基費南迪斯達成個人待遇條款，只要同艾卡迪沙傾掂轉會費，就可以完成交易。