同班主關係緊張　紐奴面臨被炒

英超首仗順利贏波嘅諾定咸森林，突然傳出紐奴帥位不穩消息，據報由於紐奴與班主馬連拿基斯意見分歧，導致關係緊張，紐奴即將被辭退。

2023年底上任嘅紐奴，帶領森林成績穩步向前，上季取得英超第7名，更因水晶宮違規降格踢歐協聯，令佢哋可以出戰歐霸盃。

不過紐奴同班主馬連拿基斯經常有拗撬，上季尾打和李斯特城賽後，馬連拿基斯就喺球場上當眾痛罵紐奴，不過1個月後，森林官宣同紐奴續約至2028年。

估唔到近日紐奴同會方再生拗撬，紐奴早前公開談論森林組軍策略問題，認為會方增兵不力；不過近日森林有所回應，喺3日內豪擲1億鎊連續簽入占士麥艾迪、奧馬利赫捷臣同卡利穆恩度。

英國傳媒報道，紐奴似乎觸怒馬連拿基斯，雙方關係緊張，令紐奴有可能成為今季英超首位被解僱領隊。