巴西神鋒1射2傳　車路士大勝開齋

周六(23日)凌晨英超「倫敦打吡」，「億萬大軍」車路士先失1球情況下，作客以5比1反勝韋斯咸，打開今季聯賽勝利之門，新加盟前鋒祖奧柏度入1球及2次助攻，演出光芒四射，車路士以5,500萬鎊(約5.8億港元)買入呢位23歲巴西國腳，絕對物有所值。

身為世冠盃盟主嘅車路士上場開鑼戰僅打和水晶宮0比0，今仗遇上另1支同市球隊韋斯咸，開賽6分鐘就失守，盧卡斯柏基達遠射入世界波，為「錘仔幫」打開紀錄。

不過，車路士好快扳平，古古列拿接應角球，頭槌二傳由祖奧柏度頂入，轉個頭韋斯咸前鋒富克洛射門入網，但球證睇完VAR後，指有球員越位，判入波無效。車仔避過一劫，果然有後福，23分鐘祖奧柏度傳中，柏度尼圖第一時間起腳射入，協助球隊反超前2比1。

跟住新加盟巴西新星艾斯迪華奧展現個人突破能力，殺入禁區右路近底線傳中，安素費南迪斯射入空門。

換邊之後，車仔發動角球攻勢，韋斯咸門將靴文臣打手槌失誤，摩西斯卡些度把握機會射入，慶祝第100次為車路士上陣。戰至58分鐘，車仔再次以角球攻勢入波，柏度尼圖開出角球，祖奧柏度頭槌二傳，後衞查禾查洛巴近門射成5比1。

祖奧柏度7月初由白禮頓加盟車路士之後，踢5場正式賽事創造6球，包括踢3場世冠盃入3球，踢2場英超入1球及2次助攻，迅速奠定進攻核心地位。因此，即使另1位進攻主將高爾彭馬今場開賽前熱身，感到不適未有上陣，都冇影響球隊攻力。