【有片】當拿隆馬感人告別 PSG又煲「魚生粥」
去片睇當拿隆馬感人告別
周六(23日)凌晨法甲，巴黎聖日耳門(PSG)主場以1比0小勝昂熱，開季連續2場煲「魚生粥」僅贏1球，今場主角係已確定離隊嘅門將基安盧基當拿隆馬，以觀眾身份入場睇波，一眾隊友好識做，邀請佢行入球場，向球迷道別。
PSG上輪開鑼戰作客贏南特1比0，今仗返回主場，開賽25分鐘獲得12碼，但奧士文尼迪比利射失，幸好下半場由法比安彭拿射入全場唯一入波，全取3分。
由於基安盧基當拿隆馬同PSG續約失敗，由歐超盃開始一直冇份入選大軍名單，佢日前亦發表離隊宣言。當拿隆馬今場身穿便服入場，隊長馬昆奴斯哥利亞、夏基美等PSG球員，帶住佢步入球場，接受球迷歡呼，作為告別儀式。呢位意大利國腳似乎有啲尷尬，要隊友推住佢入禁區，同觀眾席上球迷揮手道別。有分析指當拿隆馬同PSG不歡而散，擔心得罪球迷，但事實相反，球迷仍然對佢報以掌聲同歡呼聲。
值得一提，PSG教練安歷基同球會高層身處看台另一邊，刻意同基安盧基當拿隆馬保持距離，相信係球員自發為呢位「三冠王」功臣舉行告別儀式。