奧拿拿危險了　曼聯斟掂「新高圖爾斯」

曼聯收購門將有重大進展，根據「轉會權威」記者羅曼諾(Fabrizio Romano)爆料，紅魔鬼已經接近同比甲球隊安特衞普門將辛尼拉文斯達成個人待遇條款，有望以2,000萬歐元(約1.8億港元)轉會費將呢位23歲比利時鋼門收歸旗下，一旦成事，曼聯原本正選門將奧拿拿可能會被出售。

據悉曼聯本來打算簽入早前確定離開巴黎聖日耳門(PSG)嘅門將基安盧基當拿隆馬，但呢位意大利國腳薪酬要求太高，加上曼城加入爭奪，所以紅魔鬼轉移目標斟介辛尼拉文斯，進度非常順利，雙方已接近達成個人待遇條款，安特衞普亦接受2,000萬歐元轉會費報價，預料好大機會成交。

身高1米93嘅辛尼拉文斯出身於布魯日青年軍，兩年前轉投安特衞普，上季聯賽40次披甲，總共作出173次成功撲救，平均每場4.3次，成功撲救率達78%，被譽為當今最具潛力嘅新一代比利時門將，獲封為「新高圖爾斯」。

輿論認為佢將來成就可媲美效力皇馬嘅比利時門神泰拔高圖爾斯，如果曼聯簽到辛尼拉文斯，就可以趁機清除「防線炸彈」奧拿拿。