熱刺盡地一煲　搶購久保建英

熱刺今夏收購進攻球員處處碰壁，2位目標人選麥比奧莫、伊比爾治伊斯分別被曼聯、阿仙奴截胡，想買曼城翼鋒沙雲奴，亦傾唔掂數，最新消息指熱刺計劃收購皇家蘇斯達進攻中場久保建英。

根據「轉會權威」記者羅曼諾(Fabrizio Romano)爆料，熱刺準備加碼至7,000萬歐元(約6.4億港元)收購沙雲奴，但「藍月亮」無意放人。因此，呢支歐霸盃盟主已有兩手準備，打算斟介久保建英，呢位24歲日本國腳合約有6,000萬歐元(約5.5億港元)解約條款，熱刺希望用4,500萬歐元(約4.1億港元)收購佢。

不過，皇蘇只佔久保建英一半擁有權，另一半屬於皇馬，若然以4,500萬歐元出售佢，只能分到2,250萬歐元，未必願意放人，熱刺可能要直接用6,000萬歐元買斷久保建英合約，先至可以成事。

久保建英識講英文，有利佢適應英超環境，加上背後擁有龐大日本市場，熱刺簽久保建英，正好可以代替離隊嘅孫興民，保住亞洲市場。