莫迪歷都救唔到A米　不敵克雷莫納創125年恥辱

周日(24日)凌晨意甲開鑼立即爆出冷門，老牌勁旅AC米蘭今夏即使簽入前金球獎得主莫迪歷，但主場出擊以1比2不敵新升班球隊克雷莫納，爆出8.75倍客W，亦係A米創會125年以來首次主場輸畀呢支魚腩球隊。

AC米蘭今季聘請「金牌教練」阿里基回巢領軍，加上有莫迪歷助陣，令人有所期待。「魔笛」今仗擔任正選，以39歲零11個月14日成為意甲史上最大年齡上演「地標戰」球員，但A米佔唔到優勢，被克雷莫納中堅巴斯捷洛圖頂破大門。AC米蘭上半場補時，同樣由中堅史達軒查柏夫洛域頭槌攻入扳平1比1。

換邊後冇耐，AC米蘭獲得黃金機會，莫迪歷遠射被門將奧達路托出底線，呢位克羅地亞國腳開出角球，基斯甸普列錫起腳又被奧達路救到，注定冇運行。

戰至69分鐘出現金球，基奧斯比比薛拿左路傳中，邦拿索利半車身凌空起腳，為克雷莫納射入致勝1球。克雷莫納繼1992年5月作客贏國際米蘭2比0後，第2次意甲作客聖西路球場贏波，亦係球隊史上首次意甲開鑼戰贏波，之前8次全敗。

至於上季意甲冠軍拿玻里作客以2比0擊敗另1支新升班球隊薩斯索羅，麥湯米尼、奇雲迪布尼各入1球，當中新加盟嘅奇雲迪布尼以34歲零56日，成為1994/95年意甲實行3分制以來，最大年齡首次意甲上陣嘅拿玻里非門將球員。