淪為「第3左閘」　森美卡斯或外借羅馬

利物浦今夏大肆增兵之後，難免需要清走部分「冗員」，繼日前出售年輕前鋒賓杜亞克之後，準備將左後衞森美卡斯外借去意甲球隊羅馬，節省人工支出，亦可以令呢位29歲希臘國腳有更多上陣時間。

利物浦6月以4,000萬鎊(約4.2億港元)收購般尼茅夫左後衞米路斯卻基斯，加上原本盛傳可能離隊嘅安德魯羅拔臣並冇走人，森美卡斯已經淪為「第3左閘」，就算留隊恐怕亦難有上陣機會，所以紅軍對於放走森美卡斯持開放態度。

據悉羅馬已經提出借用，兩間球會正在磋商交易細節，森美卡斯仲有2年合約在身，周薪為7.5萬鎊(約79萬港元)，如果羅馬要借用佢，必須自行負擔全部薪酬。

羅馬今夏頻頻向英超球員埋手，已經借用白禮頓前鋒艾雲費格遜、阿士東維拉翼鋒里安拜尼，借埋森美卡斯並唔出奇。