麥巴比起孖創43年紀錄　皇馬3蛋贈奧維多

周一(25日)凌晨西甲，皇家馬德里作客3比0大破新升班球隊奧維多，開咧2戰全勝同巴塞隆拿睇齊。法國前鋒基利安麥巴比繼上場一箭定江山後，今場又梅開二度，創下球會43年新紀錄。

皇馬今場意外收起雲尼斯奧斯祖利亞，兩翼改用洛迪高高斯同馬斯坦杜奧奴，37分鐘麥巴比接應艾達古拿直線，高速入禁區射入。皇馬之後控制戰局但未能入波，雲尼斯奧斯下半場中段入替後先有起色，麥巴比83分鐘接應雲尼斯奧斯傳送再入1球，補時階段雲尼斯奧斯錦上添花，助皇馬大勝3比0。

麥巴比包辦皇馬今季聯賽頭3個入波，係皇馬自1982年嘅史泰歷克後第1人，事實上皇馬對上15個西甲入波，有12球係由麥巴比攻入。教練沙比阿朗素賽後表示：「麥巴比已經增加返世冠盃期間瘦咗嘅公斤，佢踢得好好，而且將動力散播畀隊友。入波佢一定做到，就連無球跑動都做得好好，目前呢短時間合作，感覺非常正面。」