曼聯2億鎊三叉戟0入球　艾摩廉：施斯高要時間

曼聯上季英超只入44球，係球隊戰績低落最大原因，今個暑假動用超過2億鎊，重新打造班捷文施斯高、馬菲奧斯根夏同麥比奧莫「三叉戟」，不過3位神鋒加盟後，由熱身賽同正式比賽都冇入過波，領隊魯賓艾摩廉就話唔擔心，有信心入球遲早會出現。

曼聯今場2場聯賽唯一入波，係來自富咸嘅烏龍波，備受期待嘅施斯高連續2場後備上陣，表現都非常淡靜，踢咗40分鐘都係0射門。艾摩廉賽後為佢辯護：「佢需要時間，喺咁高速嘅比賽後備上陣唔容易，佢明白呢度嘅節奏比德甲快好多，但佢仍然落力戰鬥，同隊友有唔錯嘅配合。」

除施斯高2場食白果外，根夏同麥比奧莫連同季前熱身賽，分別踼咗6場同5場都未入過波，令球迷擔心會重演上季進攻噩夢，對此艾摩廉表示：「唔會，忘記上一季。我哋成功製造好多入球機會，呢一點先係最重要，入球遲早會出現。」

好消息係，曼聯下場係周四(28日)英聯盃對英乙嘅甘士比，施斯高等前鋒有望借呢場波「刷數據」。