愛華頓贏波賀新場開幕　基亞利殊翻生交2助攻

愛華頓今季離開過百年歷史嘅葛迪遜公園球場，周日(24日)英超首度喺新主場希德球場亮相，結果憑基亞利殊交出2次助攻，2比0擊敗白禮頓全取3分，新球場取得完美開始。

基亞利殊今仗擔任左翼表現活躍，23分鐘左路突破後傳中畀伊利文尼戴耶射入，呢位前鋒上季成為葛迪遜公園最後1個入球者，今場又成為希德球場第1個入球者，名留青史。

52分鐘，基亞利殊再助攻畀占士加拿遠射建功，助愛華頓贏2比0。基亞利殊今場進攻威脅極大，同時防守積極，7次重奪球權同3次攔截都係全隊最高，2次助攻更加追平佢過去2季喺曼城助攻數字。

基亞利殊賽後表示：「對我嚟講，助攻同入波一樣咁重要，我喺曼城跟奇雲迪布尼學到好多，喺愛華頓我踢得更自由、可以更冒險，希望可以繼續為球隊帶嚟更多入波同助攻。」