利物浦3比2絕殺紐卡素　16歲天才100分鐘創神話

周二(26日)凌晨英超上演火爆大戰，利物浦作客紐卡素因「伊沙克轉會鬧劇」交惡，今場惡鬥拳拳到肉。利物浦喺領先2球兼踢多個情況下，一度被紐卡素熱血追平，不過16歲小將安古莫夏喺補時10分鐘絕殺，就為利物浦戲劇性贏出3比2，創造紅軍神話！

紐卡素前鋒阿歷山大伊沙克因扭計要轉會利物浦，至今仍然罷踢，熾熱氣氛下雙方都唔收腳，賴恩格雲貝治早段曾從後鉸剪腳飛鏟對手，走甩紅牌後更喺35分鐘遠射建功；紐卡素前鋒安東尼哥頓亦上腦，完半場前粗野踢中華基爾雲迪積克，被紅牌直接驅逐。

換邊後1分鐘，利物浦由艾基迪基入波拉開到2比0，以為形勢大好，點知10人應戰嘅紐卡素瘋狂反撲，般奴古馬雷斯同韋利安奧索拿建功，喺88分鐘追成2比2平手。16歲新星安古莫夏96分鐘入替，4分鐘後接應穆罕默德沙拿傳中，無人看管下射入致勝球。

安古莫夏喺季前熱身已非常搶鏡，今場入波更創下多項紀錄，佢以16歲361日之齡，超越活特本(17歲45日)成為利物浦史上最年輕入球者，亦係繼朗尼之後，英超史上第2個攻入致勝球嘅16歲球員，同時成為英超史上第4年輕入球者，前途無限。

利物浦領隊施洛賽後形容今場唔係足球賽，而係一場身體對抗賽：「我唔肯定今場係場足球賽，只係不斷死球、死球、手榴彈，冇乜戰術可言，但我好欣賞我哋球員嘅堅強。雖然我哋踢多個，但紐卡素每個死球都係由門將去開，其實冇乜分別。」

對於安古莫夏成為英雄，施洛亦唔覺得意外：「以安古莫夏嘅年紀，佢係處理得非常好，射門非常堅定，好少16歲球員可以做到，由佢落場第1次掂波已經無所畏懼，不斷嘗試過人，入呢個波唔係意外，因為佢係佢好出色嘅終結者！」