老闆出面游說伊沙克續約　紐迷瘋狂批鬥

利物浦對紐卡素嘅大戰，因伊沙克轉會風波令氣氛充滿火藥味，聖占士公園球場內外都出現批鬥伊沙克嘅橫額，不過據英國《每日郵報》爆料，紐卡素班主同PIF代表團日前親自去伊沙克屋企，游說佢取消罷踢兼簽新合約，令事情出現轉機。

伊沙克同利物浦成為「喜鵲」球迷公敵，利物浦隊巴今場抵達聖占士公園嗰陣，聚集數百名球迷向客隊狂噓。球場外亦有人免費送出「伊沙克係反骨仔」嘅T恤，聖占士公園看台就展示出巨型橫額：「冇人能夠獨自成就偉業，我哋係一個城市、一個群體，我哋係紐卡素」。

利物浦到埗被紐迷狂噓：https://x.com/i/status/1960038651011764638　

雖然關係破裂，不過紐卡素同伊沙克仍有一絲轉機，據報班主之一嘅占士魯賓，同PIF代表團去到伊沙克屋企會面，表明領隊艾迪侯域想佢重新歸隊，會談更包括向伊沙克開出一份新合約。利物浦早前開價1.1億鎊收購被拒，紐卡素要求收取1.5億鎊，而且要先買入2名前鋒作替補，夏天轉會窗時間無多下，要達成呢兩項轉會條件有一定難度。