艾基迪基3場入3球　曼聯新「三叉戟」係零

英超4大豪門利物浦、曼聯、阿仙奴、車路士今夏不約而同重金收購前鋒，當中以利物浦簽入艾基迪基效果最佳，呢位身價達8,200萬鎊嘅法國射手為紅軍踢3場正式賽事入3球及1次助攻，反觀曼聯新「三叉戟」係零。

艾基迪基由法蘭克福轉投利物浦後，迅速融入球隊，社區盾開賽4分鐘就入波，其後英超開鑼戰對般尼茅夫，射入1球及1次助攻，今場對紐卡素又射入靚波，換言之開季後3場都有入球進帳，效率極高，所以紅軍即使仲未簽到阿歷山大伊沙克，都冇乜所謂。

至於阿仙奴新簽射手約基利斯雖然首場英超對曼聯，連1次射門都冇，但上場對列斯聯，個人梅開二度展現身價。

車路士新加盟前鋒祖奧柏度仲犀利，7月初由白禮頓來投後，踢5場正式賽事創造6球，包括踢3場世冠盃入3球，踢2場英超入1球及2次助攻。

相比之下，曼聯豪花超過2億鎊收購班捷文施斯高、馬菲奧斯根夏同麥比奧莫「三叉戟」，但3人由熱身賽同正式比賽都冇入過波，再次應驗網絡金句：「咪又一樣！」