艾摩廉面臨被炒　拉舒福特一語成讖

曼聯今夏已斥資超過2億鎊(約21億港元)增兵，但成績仍然冇改善，英超開季後2戰只有1和1負，網絡上愈來愈多聲音要求解僱領隊魯賓艾摩廉。被外借去巴塞隆拿嘅前鋒拉舒福特早前表示，紅魔鬼真正重建從未開始過，似乎早已睇穿艾摩廉冇料到。

魯賓艾摩廉上季接替坦哈格，成為曼聯主帥後，曾經表示季中接手領軍，往往非常艱鉅，因為準備時間不足，亦未能建立自己班底。

艾摩廉經過上季大半季時間同球員磨合，以及了解英超環境，加上今夏有充裕時間畀佢備戰，會方亦大開水喉，簽入艾摩廉想要嘅3位前鋒班捷文施斯高、馬菲奧斯根夏、麥比奧莫，但球隊仍然唔識入波，今季踢2場英超，唯一一入球竟然來自對手擺烏龍，實在諷刺。因此，紅魔鬼球迷紛紛喺網上發言，要求盡快炒魯賓艾摩廉，否則球隊又會浪費一個球季。

值得一提，被艾摩廉踢走嘅拉舒福特，早前接受傳媒訪問，指曼聯仲未走出死胡同：「好多人話曼聯多年來一直處於重建，但真正重建從未開始，睇番利物浦都曾經陷入類似困局，佢哋簽入高普執教，並一直支持佢，幾年後贏得冠軍，曼聯要重建成功，必須制定計劃，並堅持執行，曼聯換過好多領隊，嘗試過唔同想法、策略，但都未走出困境。」