明奈嗌走人　引爆馬德里雙雄爭奪戰

曼聯今季成績仍然冇改善，英超2戰僅1和1負，更爆出「兵變」，根據英國《每日郵報》爆料，中場明奈不滿未獲上陣機會，有意離隊，兩支西甲勁旅皇家馬德里、馬德里體育會都有興趣借用呢位20歲英格蘭國腳。

明奈兩年前出道後，迅速上位，被譽為紅魔鬼近年少數天才青訓球員，2023/24年球季上陣32場入5球，代表作一定係上年5月英足盃決賽，射入1球協助曼聯擊敗曼城，奪得冠軍。

不過，呢位中場上季經常受傷，導致失去正選，今季情況更加惡劣，2場英超都冇份上陣，明顯不獲領隊魯賓艾摩廉信任。明奈為拯救足球事業，以及爭取國家隊席位參加明年世界盃，希望轉會爭取更多上陣時間。據悉已經引起皇馬及馬體會關注，有意借用明奈，佢亦對於轉投有份踢歐聯嘅球隊，持開放態度。

明奈現時剩下2年合約，但一直未能同曼聯達成續約協議，上季已傳出會方有意出售佢，改善財政狀況，並引來車路士挖角，今次輪到馬德里雙雄搶人。曼聯將於周四(28日)凌晨英聯盃第2圈對甘士比，如果明奈繼續坐冷板，相信極大機會走人。