韋斯咸「黑色2分鐘」崩潰　保雲同球迷衝突

周三(27日)凌晨英聯盃第2圈，兩支英超球隊交鋒出，戰局峰迴路轉，韋斯咸領先之下，踢到比賽末段經歷「黑色2分鐘」連失兩球，作客以2比3不敵狼隊，被淘汰出局。賽後韋斯咸前鋒查洛保雲同隨隊出征嘅球迷發生爭吵，幸好其他隊友拉開佢，先至冇造成更大衝突。

狼隊上半場佔有較大優勢，並喺43分鐘獲得12碼，黃喜燦主射中柱彈出，隊友洛迪高高美斯補射入網打開紀錄。換邊之後，韋斯咸展開大反攻，並迅速扳平，獲加彼德斯右路傳中，湯馬士蘇錫克近門頂入。僅過13分鐘，韋斯咸再次由右路發動攻擊，查洛保雲傳中，盧卡斯柏基達飛頂入網，協助球隊反超前2比1。

臨完場前出現大逆轉，82分鐘狼隊中場安達尼圖遠射，被門將艾路拿撲出，後備上陣嘅前鋒佐真拿臣補射入網，僅過2分鐘，泰查達奧亞右路傳中，佐真拿臣頂入，個人梅開二度，狼隊戲劇性贏3比2晉級第3圈。

韋斯咸原本大好形勢，但突然崩潰輸波出局，引起隨隊入場嘅球迷不滿，完場後出言辱罵球員，查洛保雲沉唔住氣，走到場邊同球迷爆發罵戰，更一度想衝上觀眾席，幸好隊友們及時出手拉住佢離開，否則隨時面臨處罰。

狼隊前鋒佐真拿臣今仗入2球，成為贏波大功臣，會方已經拒絕紐卡素收購呢位25歲挪威國腳。