奧拿拿復出即派膠 曼聯買龍門或被「截胡」
曼聯開季表現持續低迷,2億鎊全新鋒線未見起色,但解決門將問題更加係當務之急。英聯盃對甘士比一戰,奧拿拿復任正選即瘋狂送禮,2次犯錯送對手2個入波,互射12碼鬥足13輪只係救出1球,更慘係曼聯全力斟介嘅龍門辛尼拉文斯,亦面臨被加拉塔沙雷「截胡」!
奧拿拿季前受傷缺席大部份熱身賽,頭2場英超都由比恩迪亞把關,估唔到今場做番正選就出事,第1球被對手射穿近柱,第2球更肉酸,手錘打空氣被對手射入空門。數據顯示,奧拿拿自2023年加盟曼聯,9次犯錯導致失波,係歐洲5大聯賽龍門第1位,無人能及。
原文網址:災難!曼聯被英乙隊踢出局 艾摩廉匿埋遮醜 | on.cc東網 | 體波 https://hk.on.cc/hk/bkn/cnt/sport/20250828/bkn-20250828080024637-0828_00882_001.html
艾摩廉賽後繼續撐奧拿拿,表示出局唔可以怪晒奧拿拿,係全隊嘅問題,不過前曼聯球星沙夏就唔客氣:「奧拿拿又出現嚇死人嘅錯誤,所以上半場先輸波;輸第2球完全唔知佢想點,唔單止掂唔到個波,甚至連個波都望唔到,完全冇藉口。」
事實上,艾摩廉早就想踢走奧拿拿,日前出價1,700萬鎊收購比利時國腳辛尼拉文斯,但消息指加拉塔沙雷同曼城都加入戰團,加拉塔沙雷更向安特衞普提交「高過曼聯」嘅開價,如果曼聯唔提高價錢,隨時面臨被「截胡」。