施斯高慘被乙組仔蝦　12碼做懦夫被鬧爆

曼聯夏天斥巨資重建鋒線，令球迷對未來充滿期待，可惜開季表現就令希望幻滅，以7,400萬鎊轉會費加盟嘅班捷文施斯高，喺英聯盃對甘士比首度擔正踢足全場，但竟然畀乙組後衞全面恰死，最後互射12碼嗰陣，作出王牌前鋒嘅佢竟然係第10個主射，被球迷痛斥係懦夫！

施斯高今場有6次射門，2次射正但都唔係大威脅，但真正肉酸嘅數據係爭搶方面，全場12次對抗只贏出2次，即使有1米95身高，但係7次爭頂得1次爭贏，90分鐘內僅7次傳送(成功率64%)，莫講話入波同助攻，連關鍵傳球、傳中都係「0」。

不過最令球迷不滿嘅係，施斯高作為曼聯高價簽入嘅王牌射手，喺互射12碼居然排到第10個先出場，僅僅排喺門將奧拿拿前面，明顯係冇信心操刀，球迷都非常失望：「對住甘士比都唔夠膽射12碼」、「完全係個懦夫」、「施斯高嘅信心已跌落谷底」。