倒戈降魔!甘士比英雄係福仔「老Best」
英乙球隊甘士比喺英聯盃第2圈爆大冷淘汰曼聯,完場後大批主隊球迷衝入球場慶祝,開心到好似捧盃咁樣。入球功臣泰列爾華倫原來係曼聯青訓產品,同拉舒福特更加係「老Best」,暑假期間一齊度假同練習,今次「降魔」證明自己實力。
現年26歲嘅泰列爾華倫,喺曼聯青年軍時代同拉舒福特、麥湯米尼等做過隊友,當年摩連奴執教曼聯第1次操練,泰列爾華倫亦有份被召入一隊跟操,但呢位後衞最終都冇辦法立足,2019年離開曼聯轉投沙福特城,估唔到今次代表甘士比倒戈曼聯有波入,互射12碼佢亦射入1球,吐氣揚眉。
另外,甘士比門將派姆賽後自爆,佢本身係曼聯超級擁躉,所以對愛隊今場出局「有啲嬲」:「我仲未消化到,我本身係曼聯擁躉,所以依家都有啲嬲........經歷呢啲時刻就係我哋踢波嘅原因,我喺12碼嗰陣應該做得更好,好在隊友都做足本份。」