華迪轉戰意甲　同意加盟克雷莫納

意甲開季爆大冷贏AC米蘭嘅克雷莫納，正繼續增兵，據報該隊正斟介占美華迪，談判進入最後階段，即將拍板。

意大利傳媒報道，華迪已經同意加盟該新升班球隊，只差合約細節作最後磋商，傾掂後就可官宣。

38歲嘅華迪今夏離開李斯特城後並未掛靴，之前傳過佢同多隊接觸，近日終於敲定去意甲，將以自由身加盟，亦係華迪生涯首次離開英倫到外地發展。