【有片】卡拉特環遊世界 抽中皇馬阿仙奴勁High
歐聯抽籤豪門雲集，其中嚟自哈薩克嘅卡拉特首度參賽，雖然好大機會成為陪跑份子，不過對佢哋嚟講就係千載難逢機會，當抽中要對皇家馬德里、阿仙奴嗰陣，一眾睇直播球員即興奮歡呼，開心過中六合彩！卡拉特4場作客總共要飛近45,000公里，足夠環繞地球一圈！
卡特拉喺外圍賽連過4關，淘汰些路迪等勁旅入正賽，獎勵係有機會對皇家馬德里、國際米蘭、阿仙奴、布魯日、奧林比亞高斯、士砵亭、帕福斯同哥本哈根，當中4場作客去倫敦、米蘭、里斯本同哥本哈根，來回飛行旅程達44,792公里，作客士砵亭一仗要飛6,908公里，亦係歐聯史上最遠距離對賽紀錄。
卡拉特球員有機會「環遊世界」踢歐聯，當然係天賜良機，但對於要作客飛去哈薩克比賽嘅球隊就唔好受，皇家馬德里就要飛6,411公里去作客，據報機程長達12個鐘頭，亦會係皇馬史上最遠距離歐聯作客比賽。