【官宣】蘇斯克查被炒　曼聯機會來了

土耳其球隊比錫達斯喺周五(29日)凌晨歐協聯附加賽次回合主場0比1不敵洛桑，兩回合合計輸1比2出局，會方憤而炒教練，正式宣布解僱主帥蘇斯克查，結束雙方短短7個半月賓主關係。

比錫達斯首回合作客打和瑞士球隊洛桑1比1，今仗有地利優勢，反而輸波收場，踢到上半場補時，被奧耶迪積射入大門，呢位22歲前鋒剛於7月由阿仙奴轉投洛桑。下半場一開波，比錫達斯中堅烏度卡凱被逐，注定無法翻身。

比錫達斯黯然出局後，會方立即宣布炒蘇斯克查，聲明中話：「經過董事局會議後，決定同蘇斯克查解約，即時生效，感謝蘇斯克查嘅貢獻。」呢位52歲挪威名帥今年1月中擔任比錫達斯教練，上季獲得聯賽第4位，雖然今季開鑼戰贏波，但卻喺歐協聯附加賽出局，會方已經冇耐性，寧願盡快換帥。

適逢曼聯領隊魯賓艾摩廉面臨下台危機，唔少網民建議紅魔鬼邀請蘇斯克查回巢救亡，佢2018年12月接替摩連奴，執教曼聯曾取得佳績，最威水係2020/21年球季獲得英超亞軍，雖然之後因為成績差被炒，但仍然深受曼聯球迷歡迎，一旦艾摩廉被炒，蘇B的確係看守領隊最佳人選。