紐卡素重金簽「2米美斯」　伊沙克就快走得

收購前鋒行動處處碰壁嘅紐卡素，周五(29日)終於搵到真命天子，據報「喜鵲」已同史特加達成協議，將用6,900萬鎊收購德國新星禾達美迪。呢部「新轟炸機」即將降臨，亦代表紐卡素可以同阿歷山大伊沙克講Bye Bye，等候多時嘅利物浦將會再提出收購。

各大媒體報道，紐卡素出價6,500萬鎊，另外400萬鎊獎金條款獲史特加接納後，23歲嘅禾達美迪已經飛去英國做體測，完成後就正式簽約。6,900萬鎊轉會費將打破紐卡素買人紀錄，舊紀錄係3年前用6,300萬鎊，由皇家蘇斯達買入伊沙克。

禾達美迪身高接近2米，但有出色嘅腳下功夫，被隊友稱為「2米美斯」，上季德甲入12球嶄露頭角，夏天U21歐國盃亦大放異彩，拜仁慕尼黑本來已準備將佢收歸旗下，但因轉會費傾唔掂而擱置，依家紐卡素重金禮聘，即刻「水」到渠成。

紐卡素高價簽入禾達美迪，意味扭計罷踢嘅伊沙克將可以離隊，轉會權威羅曼諾表示：「利物浦已準備全力一擊買伊沙克，球員想加盟嘅心一直冇變，如果紐卡素簽到禾達美迪(同另一前鋒)後願意放行，利物浦已經準備就緒。」