搞掂！加拿祖今日體測上「車」簽7年

曼聯翼鋒阿歷真度加拿祖轉會問題取得突破，英國各大傳媒及「轉會權威」記者羅曼諾(Fabrizio Romano)不約而同指紅魔鬼已同意將呢位21歲阿根廷國腳出售畀車路士，轉會費為4,000萬鎊(約4.2億港元)。據悉加拿祖將於周五(29日)稍後時間進行體測，如無意外將同車仔簽約7年。

曼聯今夏已決定將阿歷真度加拿祖出售，即使有多支球隊有興趣簽入呢位新星，但佢只想加盟車路士，甚至拒絕德甲勁旅拜仁慕尼黑邀請。由於英超轉會市場將於9月1日晚關閉，紅魔鬼最終讓步，同意畀加拿祖上「車」。

車路士將向曼聯支付4,000萬鎊轉會費，成為紅魔鬼史上第4高價出售球員，僅次於C朗、盧卡古、迪馬利亞。另外，如果車仔將來出售阿歷真度加拿祖，紅魔鬼可以獲得10%轉會費分紅。

加拿祖屬於曼聯青訓產品，近2季有不俗表現，包括上季上陣58場入11球及10次助攻，但魯賓艾摩廉成為曼聯主帥後，將佢投閒置散，最終黯然離隊。