熱刺孤注一擲　7000萬歐元搶購沙維西蒙斯

熱刺今夏收購進攻球員處處碰壁，現時準備孤注一擲，以總值7,000萬歐元(約6.4億港元)轉會費搶購RB萊比錫翼鋒沙維西蒙斯，但RB萊比錫管理層仍在考慮當中，似乎仲等緊其他球會報價，希望賺到盡。

熱刺曾經想簽麥比奧莫，但佢已轉投曼聯，另外2位收購目標洛迪高高斯、沙雲奴，都未有進展，現時全力爭取買入沙維西蒙斯。呢位22歲荷蘭國腳一度被指好大機會轉投車路士，但隨住車仔即將簽入曼聯翼鋒阿歷真度加拿祖，可能放棄買沙維西蒙斯。

熱刺趁機搶人，向RB萊比錫開出6,000萬歐元固定轉會費及1,000萬歐元浮動轉會費，希望呢支德甲球隊放人。

沙維西蒙斯2年前被巴黎聖日耳門外借去RB萊比錫，一直有出色表現，包括上季上陣33場入11球及8次助攻，RB萊比錫今年1月豪花5,000萬歐元買斷佢，可能認為熱刺出價未夠高。