A米新兵受傷長抖3個月　急斟尼干古救亡

意甲勁旅AC米蘭新加盟中場阿當查沙利近日操練期間受傷，可能缺陣3個月，會方急需要再增兵救亡，根據「轉會權威」記者羅曼諾(Fabrizio Romano)爆料，A米準備以總值4,200萬歐元(約3.8億港元)收購車路士進攻中場尼干古。

AC米蘭今夏豪花3,900萬歐元(約3.5億港元)向布魯日收購阿當查沙利，點知呢位23歲瑞士國腳近日操練期間，右腳腓骨出現骨折，面臨長抖3個月。加上AC米蘭首輪聯賽不敵新升班球隊克雷莫納，表現令人失望，惟有繼續增兵提升實力，並睇中尼干古。

車路士早已決定出售呢位27歲法國國腳，曾經傳出拜仁慕尼黑有意簽入佢，但又冇下文。據悉車仔要求最少3,500萬歐元固定轉會費，另加浮動轉會費。雖然AC米蘭開出總值4,200萬歐元轉會費買尼干古，但當中固定轉會費是否達到車仔要求，仍然係未知之數。尼干古上季為車路士披甲48次，射入15球及5次助攻，但主要踢盃賽。